محكمة الأسرة اليوم 2020… جدي اغتصبني وجوزي رافض نسب بنتي

من يحمي عرضي إذا نهشه جدي، ومن يصن شرفي إذا خانه من ولدت من صلبه، ومن يراعيني إذا رماني والدي لكلاب الشوارع تنهش لحمي.

" نهش عرضي ونسي إني لحمه ودمه، وبدل مايصون شرفي، ويحميني من الدنيا بعد طلاق أبويا وأمي، دمرت حياتي، منه لله "، هكذا صرخت أمام محكمة الأسرة مطالبة بنسب طفلتها.

وقالت الأم البالغة من العمر ٢٤ عاما أمام محكمة الأسرة بالتجمع الخامس: "بدأت حكايتي وأنا فى ثانوية عامة، حبيت ولد من سني، بس بدأت مع قصتي مشاكل كتير بين أبويا وأمي، وبدأت قصة انفصالهم حسيت بعدها إني ضيعت ومريت بأزمة نفسية وسقطت فى المدرسة، وبعدها أبويا رماني واتجوز طليقة أخويا، وأمي عملت زيه رمتني واتجوزت، وعيشت مع جدي، صاحب كشك شاي وعنده ٦٠ سنة، فى البداية كان بيتحرش بيا، بس كتت بقاومه، وبعد كده بدأ يعتدي عليا ويهددني إني لو جبت سيرة لحد محدش هيصدق إن راجل عجوز عمل كده فى بنت ابنه، فكنت بخاف واسكت".

وأضافت أمام محكمة الأسرة بالتجمع الخامس: "الشخص اللي كنت بحبه ظهر فى حياتي من تاني، واتقدم عشان يخطبني، خوفت أحكيله عمايل جدي يبعد عني، وخوفت أكتر لما اتحدى أهله عشاني، وفعلا اتجوزنا واتغاضي عن إني مش بنت ومسألش، وبعد ٨ شهور خلفت، مكنتش أعرف إنها من جدي، وافتكرت إن الحمل طبيعي".

وتابعت أمام محكمة الأسرة بالتجمع الخامس: "بدأت مشاكلي مع أهله لما جبت الطفل التاني، وفضلت تقولي إشمعنا ده شبه أبوه والبنت لاء، وبدأت تشكك فى نسب البنت، لحد ماجوزي طاوعها وعمل تحليل DNA للبنت، ونكتشف إنها مش بنته، وبعد ٤ سنين اكتشفوا جريمة جدي".

وأكملت أمام محكمة الأسرة بالتجمع الخامس: " حياتي ادمرت وجوزي طلقني، ورفع عليا قضية إثبات نسب للبنت طردني وأخد مني ابني محمد، روحت لأمي يمكن تحن عليا، بس هي طردتني، وأبويا عايش فى عالم تاني مع طليقة أخويا، بس جوزي كان لسه بيحبني عطف عليا وأجرلي شقة، وكان بيدفع إيجارها لحد ما أمه عرفت، وأجبرته يبعد عني، فبدأت أدور على شغل، وبدأت مرحلة جديدة من الإهانات بسبب إني مطلقة والكل شايفني لقمة سهلة".

وقالت الأم والفتاة الضحية أمام محكمة الأسرة: "أنا مش عايزة أعيش فى الحرام، أنا عاوزة أشتغل وأربي بنتي وعاوزة أطلعلها شهادة ميلاد، مش عاوزاها تكون مجهولة النسب، مش عاوزة مستقبلها يضيع زي ماضاع مستقبلي".


وقررت محكمة الأسرة بالتجمع الخامس نفي نسب الطفلة للزوج لكونه أبا غير قانونيا، والنظر فى دعواها لنسب طفلتها للجد.