عضو مجلس الأهلي السابق يوجه رسالة نارية لإدارة الخطيب بسبب تركي آل الشيخ
وجه خالد حببب عضو مجلس إدارة النادي الأهلي السابق، رسالة لمجلس القلعة الحمراء الحالي برئاسة محمود الخطيب، بعد هجوم تركي آل الشيخ رئيس الهيئة العامة للترفيه بالمملكة العربية السعودية.
وكتب "حبيب" عبر حسابه الشخصي على موقع التواصل الاجتماعي "فيسبوك": "الراجل السعودي شغّال تلبيخ وإهانات من إمبارح لمجلس إدارة الاهلي، ووصف شنيع بأنه مفيش رجّالة، وكمان نشر لتسجيل صوتي بادعاء أن الإدارة هي الّي بتحرّك صفحات السوشيال ميديا بالفلوس.
وأضاف: "كالعادة الإدارة في صمت، الإدارة المحترفة بتقول إيه بقى في المواقف دي، أولا انك عمرك ما تدخل في سجال لفظي وخناقة وشتايم مع أي حد، خصوصا لو أقل منك، ساعتها بتنزل لمستواه وبتاخد من القذارة، وهو مش بيطلع لمستواك".
وتابع عضو الأهلي السابق: "ثانيا بتقول ان الموقف الرديء اللي النادي وتحديدا مجلس ادارته بقى فيه بسببهم، مش بسبب الراجل السعودي، تنازلات وأخطاء متتالية، وسكوت عن مهازل وإهانات، وآخرها موقف حسام عاشور وقبله مؤمن زكريا، اللي هو نظام أصرف على مراتي وولادي وانا عامل مش واخد بالي".
وواصل: "التمن كبير قوي، وحماس ونخوة المهندس محمد سراج ( الّي اسمع عنه كل خير واحترام)، مش معناها الاندفاع والدخول في صراعات ألفاظ خارجة وخناقات شوارع عمر ما الأهلي العظيم دخل فيها زي غيرنا".
مضيفًا: "حضرتك النهاردة ممثل للنادي الأهلي، ما ينفعش تعمل كده، الإهانة مش شخصية، الإهانة لمجلس الإدارة، وهو المطالب إنه ياخد الموقف، أي موقف".
اقرأ أيضًا: تركي آل الشيخ يواصل هجومه على عضو مجلس الأهلي: ”فاشل ومش متربي”
واختتم "حبيب" تصريحاته: "اتمنى أصحاب المهندس سراج ينصحوه، ما تنزلش لمستوى مش بتاعك، وسمعة النادي موضوع تاني، اتكلم واتخانق واضغط فيها جوه المجلس، مسؤولية المجلس كله، ربنا يفوّق النايمين ويبعد المنافقين ويهدّ الفاسدين والطماعين".
