اشترِ أرضك.. بس ما تستلمهاش! تحذيرات من طريقة تسويق مشبوهة

في شكاوى كتير بتوصل من ناس دخلوا يستثمروا في مشروعات أراضي، ودفعوا مبالغ كبيرة على أمل ياخدوا قطعة أرض يزرعوها أو يشتغلوا فيها، لكن اللي حصل إن الأرض فضلت في إيد البائع، وهو اللي بيزرعها وبيتحكم فيها، والمشتري ملوش فيها غير عقد على الورق.

اللي يقلق كمان إن العقود دي مش بتحدد فين الأرض بالضبط، لا حدود واضحة، ولا استلام فعلي، يعني فلوسك رايحة في حاجة مش عارف حتى تلمسها، ولا تضمنها. ولما تيجي تسأل، يقولك: "هنزرعها احنا ونديك العائد"، طب فين الضمان؟ وفين حقي لو حبيت أزرع أنا أو أبيع؟

وفي وسط وعود بعائد عالي أول شهرين، ناس بدأت تسأل: هو ده استثمار حقيقي ولا مجرد وسيلة لجمع الفلوس؟ خاصة بعد ما عرفنا إن في أرض زي "س" اتسحبت من نفس المجموعة قبل كده، ولسه الناس بتدوّر على فلوسها.

اللافت إن الكلام ده مرتبط بإحدى الشركات المعروفة بالرمز (أ.لـ.)، واللي بيظهر في واجهتها شخصية إعلامية ورجل أعمال شهير بالرمز (ع.ز)، واللي بيدّي دايمًا وعود براقة عن عوائد كبيرة وفرص زراعية مش موجودة في أي حتة.

اللي نقدر نقوله: خليك واعي، وافهم إنت بتشتري إيه، وفين، وإزاي. مفيش حاجة اسمها تشتري أرض وماتشوفهاش.